O concello obrigado a pagar 14,5 millóns de euros pras sentenzas xudiciais

O concello destinará por obriga legal os 14,5 millóns de euros do remanente a pagar as sentenzas xudiciais

Hoxe, na Xunta de Voceiros, trasladóuselles aos grupos da Corporación a contía que ten que ir destinada, segundo o estipula a lexislación, a aboar as sentenzas xudiciais, que lle suporán ao concello un pago de xuros anuais dun 3%, unha “sangría económica”

Inés Rey anuncia que a Comisión de Facenda estudará a reorientación do orzamento municipal e destaca a boa disposición de todos os grupos para atoparen un “mínimo denominador común de propostas”

A Coruña, 13 de abril de 2020.- A alcaldesa da Coruña, Inés Rey, e o voceiro do Goberno local, José Manuel Lage, trasladáronlles aos grupos da Corporación, na Xunta de Voceiros, a conta da liquidación do ano 2019. Segundo explicou Lage Tuñas, o remanente do concello ascende a máis de 14,5 millóns de euros que terán que seren destinados, por obriga legal, a pagar as sentenzas xudiciais firmes e as facturas pendentes de exercicios anteriores.

Neste senso, é importante destacar que as sentenzas xudiciais lle estaban a supor ao concello un pago de xuros anuais dun 3%, “unha sangría económica ano a ano”, segundo o voceiro do grupo de goberno. 

Lage lembra que no pasado mes de novembro o concello buscou unha solución para non cargar as sentenzas nos orzamentos municipais e o Ministerio de Facenda autorizou a incorporación destas como obrigas recoñecidas de pago na conta 413.

Desde xeito, tanto o superávit municipal como o remanente líquido de tesourería teñen que se destinaren, case na súa totalidade, a saldar estas obrigas.

Exactamente o concello tivo un remanente de tesourería en 2019 de 14.581.686,93 euros e un superávit de 3.662.503,48 euros. E, a conta 413, de obrigas recoñecidas, ascendía a 15.916.125 euros. Lage lembra que até o 6 de abril saldáronse

1.335.604 euros desta conta de obrigas recoñecidas.

COMISION DE FACENDA

Pola súa banda, Inés Rey, sinala que o Goberno local está estudando unha serie de medidas para facer fronte aos efectos socioeconómicos derivados da crise sanitaria pola pandemia do coronavirus COVID-19. Asegura que a Comisión de Facenda estudará a reorientación do orzamento municipal e destaca a boa disposición de todos os grupos para atoparen un “mínimo denominador común de propostas”

Co fin de poñer en marcha estas medidas o concello está estudando o impacto económico da crise nas arcas públicas para dirixir os recursos existentes a cumprir cos obxectivos sinalados que son protexer as e os máis vulnerables e dinamizar ao máximo a economía local. 

“Temos que atopar entre todas as forzas un consenso nas medidas que se vaian adoptar para reorientar o orzamento, e acadaremos unha proposta común co maior grao de acordo posible”.