As bolsas comedor resolveranse tras o inicio escolar

As bolsas comedor resolveranse tras o inicio escolar ante a demora da súa convocatoria polo anterior executivo

•             Neira asegura que o atraso da publicación da convocatoria (6 de maio) e os permisos autonómicos, que se concederon a finais de xullo, fan inviable que as bolsas estean resoltas no seu prazo.

•             A tramitación para estas bolsas, a pesar de reforzar o servizo con varios funcionarios doutras áreas, non se resolverá ata finais de setembro, aínda que aclara que os proxenitores que paguen o comedor desde o inicio do curso escolar en setembro e que posteriormente resulten beneficiarios da bolsa percibirán a axuda integramente.

A Coruña, 17 de agosto de 2019.- A Concellería de Benestar Social traballa ás alancadas para tramitar as 1996 bolsas comedor solicitadas para o curso 2019/20 que arrinca o 9 de setembro. Asegura que o atraso da publicación da convocatoria (6 de maio) e os permisos autonómicos, que se concederon a finais de xullo, fan inviable que as bolsas estean resoltas no seu prazo. “Lamentamos que as bolsas non se convocaran a tempo, tendo en conta que as bolsas comedor tiveran atraso en exercicios anteriores, para evitar esta situación outro ano máis. Nós convocarémolas unha vez que se aprobe o orzamento o máis axiña posible para lles evitar este prexuízo ás persoas beneficiarias”, apuntou Neira.

Segundo a concelleira de Benestar Social, Yoya Neira, a tramitación para estas bolsas, a pesar de reforzar o servizo con persoal funcionario doutras áreas, non se resolverá ata finais de setembro, aínda que aclara que as nais e pais que paguen o comedor desde o inicio do curso escolar en setembro e que posteriormente se beneficien da bolsa, percibirán a axuda integramente. Co fin de paliar a demora neste tipo de axudas, a concelleira anuncia que adiantará a convocatoria das bolsas comedor no principio do ano e non esperará ata o mes de maio ou xuño, como en exercicios anteriores. “Non é viable tecnicamente analizar 2000 solicitudes, baremalas, publicar as listaxes oficiais, resolver as alegacións pertinentes e volver publicalas de forma oficial en algo máis de 30 días laborais”.