Máis de 5.000 fogos na Batalla Naval

Máis de 5.000 fogos representarán na

Batalla Naval a victoria da cidade ante o corsario Francis Drake 

O corte total ao tráfico no Paseo Marítimo efectuarase ás 22.00 horas e a zona recomendada para desfrutar do espectáculo, que comezará ás 23.00 horas, é desde a praza de Portugal ata a fonte dos Surfistas

A Coruña, 13 de agosto de 2019.- As festas de María Pita trasladaranse mañá ao Paseo Marítimo, onde se poderá gozar pola noite dun dos grandes eventos do ano, a Batalla Naval, en que se darán 5.040 ordes de disparos para representar a vitoria da cidade ante o ataque do corsario inglés Francis Drake. A empresa ourensá Xaraiva, que se estrea na cita, ofrecerá unha posta en escena de case vinte minutos, en que mesturarán unidades secuenciais e dixitalizadas desde os puntos lanzadeiras das Escravas e a finca dos Mariño. Ademais dos fogos aéreos, a firma combinará tamén pirotecnia acuática con efectos dixitais diversos. No ceo, poderanse ver figuras de corazóns, salgueiros, abelorios, aros e caras, todo iso acompañado de moito trono e de asubíos. 

Por outra parte, unha ampla despregadura de seguridade estenderase na zona durante a xornada de mañá para evitar que se produciren incidencias. Desde hoxe ás 9.30 horas, que foi cando se instalou o camión da empresa pirotécnica, está cortada ao tránsito de peóns a contorna das Escravas, desde o paseo de Rolda, á altura da sala Moon, ata o principio do areal de Riazor. Alí traballa a Policía Local xunto con seguridade privada para impedir que pase a xente. 

O segundo punto de lanzamento, a finca dos Mariño, activarase mañá. Nas Escravas establecerase un perímetro de seguridade de 300 metros terrestres e 600 metros acuáticos. A partir das 21.00 h, prohibirase que circulen vehículos na contorna das Escravas, incluída a explanada do Pazo dos Deportes. Quedará inutilizado tamén o paseo entre a praza de Portugal e as Escravas, xa que sobre a baía ofrecerase un espectáculo de fogos acuáticos de máxima potencia, en concreto, de 150 milímetros. 

 O corte total do Paseo Marítimo ao tráfico realizarase ás 22.00 h. A organización recomenda desfrutar do show desde a praza de Portugal á fonte dos surfistas. De momento, as predicións meteorolóxicas apuntan a que haberá precipitacións á tarde pero que remitirán á noite, polo que non se espera que as inclemencias do tempo imposibiliten ver o espectáculo.