Comisión de Transparencia - Eleccións xerais da Marea

A Marea Atlántica logra un acordo unánime para que o goberno municipal renda contas na Comisión de Transparencia 

 

Todos os grupos políticos acordan que o goberno ofreza informes periódicos sobre as políticas de transparencia, a contratación pública e o gasto en publicidade

Comisión de Transparencia aceptou hoxe, por unanimidade, a proposta do seu presidente e concelleiro da Marea Atlántica, Iago Martínez, para fixar algunhas obrigas básicas do goberno municipal á hora de render contas ante este órgano. Deste xeito, o executivo local comprométese a presentar unha serie de informes periódicos sobre transparencia, contratación pública e publicidade institucional. “É un compromiso que permitirá mellorar a capacidade de fiscalización da acción de goberno por parte da oposición e que redundará tamén nunha maior transparencia do Concello diante da cidadanía”, explica o edil.
O acordo adoptado hoxe fixa a obriga de presentar cada tres meses un informe sobre a contratación​ pública,​ comezando en marzo de 2020, e incluíndo a porcentaxe de fondos destinados a cada un dos tipos de contratos previstos legalmente. Cada semestre darase conta do gasto en publicidade​ e propaganda cada semestre, detallando, cando menos, os gastos relacionados cos medios de comunicación. E cada ano entregarase unha análise sobre as políticas​ de transparencia e o grao de cumprimento da normativa específica e dos indicadores de Transparencia Internacional (ITA), con carácter anual.
O presidente da Comisión valorou positivamente “o acordo, o debate construtivo e mesmo a disposición, por parte de todos os grupos, para flexibilizar os prazos a petición do goberno, o que axudará a normalizar o exercicio de rendición de contas e transparencia, fundamental en calquera institución democrática”, e confiou en que o executivo fará o posible por cumprilo con dilixencia. 

Mellor acceso á información 

Ademais, no transcurso da comisión solicitóuselle ao goberno local maior dilixencia á hora de proporcionar información polas canles regulamentadas, tanto as preguntas escritas de Pleno como as solicitudes de acceso á información, cousa que ata o de agora se está a facer de xeito insuficiente.  

A Rede da Marea Atlántica decide non participar na campaña das eleccións xerais

 

A organización fai un chamamento a recompoñer o espazo de confluencia despois do 10N, desde fórmulas de cooperación, e a apoiar candidaturas que defendan os dereitos sociais ante a involución democrática no Estado e o avance da ultradereita

A Rede da Marea Atlántica acordou onte non participar na campaña das eleccións xerais do 10N e manter unha postura de neutralidade ante a

división do espazo político que na Coruña está representado pola nosa organización municipalista. Deste xeito, e a proposta do Grupo de Traballo de Relacións Políticas, a asemblea celebrada no local da Praza dos Ovos, adoptou por maioría o seguinte acordo:

1.      A Marea Atlántica manterá unha posición autónoma respecto das distintas forzas que concorren ás eleccións, a fin de garantir o respecto á pluralidade interna.

2.      As persoas que forman parte da nosa organización poderán apoiar libremente calquera das opcións, pero tanto a marca coma os recursos da Marea Atlántica quedarán á marxe da confrontación electoral.

3.      As persoas da Marea Atlántica que desempeñen postos representativos, tanto institucionais coma orgánicos, non comprometerán o posicionamento político da Marea Atlántica.

4.      A Marea Atlántica apela á responsabilidade de todas e todos, e comprométese coas forzas do cambio na tarefa de recomposición do noso espazo político, procurando fórmulas de cooperación e innovación que permitan recuperar as institucións para a xente e o establecemento dunha axenda política plural, coherente co espírito que deu lugar ao nacemento das candidaturas municipalistas e ao servizo das maiorías sociais. Esta cuestión resulta urxente polas convocatorias electorais vindeiras e pola necesidade de adaptarnos ao novo ciclo político evitando que a posible nova recesión se resolva como a anterior, caendo sobre as costas dos máis febles.

Cara á reconstrución do espazo político

O texto aprobado onte sinala que “é evidente que as lóxicas competitivas dentro do noso espazo político abócannos a unha situación subalterna, cando non residual, mentres que as dinámicas de cooperación convértennos na alternativa ás políticas neoliberais”. 

En todo caso, nun momento de involución democrática no conxunto do Estado, cómpre facer un chamamento á participación electoral, apoiando sempre opcións progresistas e cunha axenda clara a favor dos dereitos sociais, capaz de facer de contrapeso ao avance da ultradereita.  E, como engade o texto, “tampouco podemos esquecer que estamos a poucos meses doutra convocatoria electoral, na que se pretendemos que o espazo do cambio teña algunha oportunidade, vai ser imprescindible construir".