Convócanse as subvencións para o deporte - XXVIII Xogos Florais María Pita

Convócanse as subvencións para a promoción e o fomento do deporte por valor de 120.000 €

O prazo para solicitar estas axudas comeza mañá e remata o 31 de outubro, ambos os dous días incluídos.

A Coruña, 16 de outubro de 2019.- O Boletín Oficial da Provincia da Coruña publica hoxe o extracto do acordo da Xunta de Goberno Local pola que se convocan subvencións en réxime de concorrencia competitiva para a promoción e o fomento do deporte. 

A contía total para repartir destas subvencións será de 120.000 € e o prazo para solicitalas é de 15 días naturais a partir do día seguinte á publicación no BOP, é dicir, desde mañá día 17 de outubro ata o 31 deste mes, os dous incluídos. As solicitudes poden presentarse a través da sede electrónica do concello https://sede.coruna.gob.es ou no Rexistro Xeral do Concello con destino ao Servizo Municipal de Deportes.

Desde o Servizo Municipal de Deportes recoméndaselles ás entidades que vaian participar nesta convocatoria que soliciten cita nas oficinas situadas no Palacio dos Deportes (tfno. 981 184 200 extensións 25025 – 25030) antes de presentar a documentación para comprobar que esta sexa correcta.

Para máis información, consultar a web: www.coruna.gal/deportes  

O edil de Cultura asiste á presentación dos XXVIII Xogos Florais María Pita que este ano se dedican a Isabel Zendal

A Coruña, 16 de outubro de 2019.- O concelleiro de Cultura, Jesús Celemín, asistiu esta mañá á presentación dos XXVIII Xogos Florais da Orde de Cabaleiros de María Pita, que este ano se celebrarán en honra á enfermeira Isabel Zenda, xunto ao presidente da entidade, José Duarte.

O concelleiro expresou o apoio do Concello a unha iniciativa que “reivindica o papel da poesía e da historia da nosa cidade” e lembrou que o certame xa fora dedicado a figuras como Pablo Picasso, Concepción Arenal, Eusebio da Guarda e, na última edición, á matemática María Wonemburger. 

Os temas do concurso poético, cuxo xurado estará presidido pola poetisa Yolanda Castaño, deberán versar sobre a figura de Isabel Zendal e/ou o lema “Valentía e xenerosidade sen fronteiras”. As composicións deberán ter un máximo de 100 versos e un mínimo de 32 e poderán presentarse tanto en galego como en castelán. Cada autor poderá concursar cun máximo de dúas obras e o prazo de entrega finaliza o 2 de decembro. 

A gala de entrega dos premios terá lugar o Teatro Colón o 12 de decembro. Ademais do recital poético, na 2ª parte do acto participarán a Unidade de Música da Forza Loxística e as nenas e os nenos do colexio público Labarta-Posse de Baio, que farán unha representación da Real Expedición Filantrópica.

O acto contou ademais con presenza de Dolores Estrada da Fundación San Rafael e Richard Huerta, director do Ibis Hotel e vicepresidente da Asociación empresarial de Hospedaxe da Coruña HOSPECO, entidades colaboradoras do certame.