Marea Atlántica e Libera apostan pola xestión pública do centro municipal de acollida animal

Marea Atlántica e  Libera apostan pola xestión pública do centro municipal  de acollida animal

 

Reclaman do goberno local un cambio de rumbo nas instalacións da canceira en Bens, cunha xestión 100% pública apoiada por programas de voluntariado Máis de 42.000 sinaturas sumáronse á proposta que xa se trasladou a todos os grupos da oposición en María Pita

A Asociación Animalista Libera e o grupo municipal da Marea Atlántica mantiveron nun novo encontro de traballo para avanzar na proposta que o colectivo en defensa dos animais ten para municipalizar a canceira, cuxa concesión finaliza en 2021.

A Marea Atlántica e Libera coinciden en que unha xestión 100% pública, apoiada por programas de voluntariado e colaboración con entidades protectoras, daría resposta a crecente demanda social que esixe mudanzas de fondo nas intervencións das administracións públicas en materia de benestar animal, e subliñaron os importantes avances acadados no anterior mandato, como o incremento nun 67% do número nas entregas de cans a familias.

O colectivo animalista xa reuniu máis de 42.000 sinaturas e mantivo encontros coa totalidade dos grupos políticos da oposición en María Pita, para presentarlles a súa campaña para acadar un centro municipal de acollida público e baixo xestión directa do Concello, lembrando que na institución local existe experiencia para levar adiante este traballo cando finalice o contrato que leva vixente dende 2006.

O encontro tamén serviu para valorar os primeiros meses de goberno do PSOE e as propostas que poderían poñerse sobre a mesa para implantar políticas públicas de benestar e protección dos animais na Coruña para 2020.


A Marea Atlántica solicita acceso ao expediente das bolsas comedor, para analizar as causas das denegacións masivas

 

Silvia Cameán volve instar ao goberno a facilitarlle ás familias a achega de nova documentación, ante o gran número de erros cometidos pola propia Administración

A concelleira da Marea Atlántica e presidenta da Comisión de Benestar Social, Silvia Caméan, solicitou hoxe acceso ao expediente do programa municipal de bolsas comedor para analizar as causas das denegacións masivas, máis dun milleiro, que se produciron este curso. “Segundo os datos facilitados polo propio goberno, houbo 1.177 solicitudes rexeitadas, das que 510 foron por falta de documentación, e nas que existiron, como mínimo, 65 casos de erros imputables á Administración. É inasumible, e o resultado é que se concederon 441 axudas menos que o ano pasado”, argumenta Cameán.
Ante esta situación, o grupo municipal da Marea Atlántica revisará a fondo as causas de denegación, e volverá solicitarlle ao goberno do PSOE que abra un verdadeiro prazo de subsanación para todas as bolsas denegadas, ante as inasumibles cifras de rexeitamentos e o elevado número de erros detectados. “A ampliación do prazo de alegacións, anunciada este martes, está a ser confusa e as familias están a atopar problemas para presentar documentación. O que agardamos dun goberno preocupado pola infancia son solucións reais, non escusas para cubrirse as costas”. sinalou Silvia Cameán.
A edil volveu reclamar, como xa fixo esta semana na Comisión de Benestar Social, “que se resolva de inmediato todas as bolsas comedor que están concedidas, para reducir ao mínimo a demora ata que as familias poidan cobrar a axuda, que xa é moi longa”. E engadiu que “en moitos fogares, as axudas para o comedor son fundamentais para garantir unha alimentación saudable para as nenas e nenos, polo que deben tramitarse como unha prioridade, con máximo rigor”.