Modepen súmase á marcha pensionista

Modepen súmase á marcha pensionista do vindeiro 16 de outubro en Madrid

O 21 de setembro saíu de Rota, Cádiz, unha columna de pensionistas que recorrerán a pé 645 quilómetros ata Madrid; e o 23 saíu de Bilbao a columna Norte que se unirá con compañeiras e compañeiros de Asturias e Cantabria. Ambas columnas chegarán o 15 de outubro a Madrid e o 16 xuntarémonos arredor de 300 plataformas de pensionistas de todo o Estado, que conforman a COESPE, para concentrarnos diante do Congreso dos Deputados en defensa do Sistema Público de Pensións, e esixir a derrogación das regresivas reformas lexislativas de 2011 e 2013, entre outros puntos da nosa táboa reivindicativa.

O Movemento Galego pola Defensa do Sistema Público de Pensións (MODEPEN), manifesta a seu total apoio ás compañeiras e compañeiros que compoñen ambas columnas, que son un exemplo de loita solidaria interterritorial e interxeracional, na defensa dun dereito tan básico e imprescindible para a clase traballadora como é a percepción dunha pensión que lle permita, despois dunha longa vida laboral,  vivir dignamente os últimos anos da súa vida.

Galicia estará presente na mobilización do 16 en Madrid coa participación das distintas plataformas que conforma MODEPEN. Para facilitar a asistencia a tódalas persoas que queira asistir, van saír autobuses de Coruña, Ferrol, Compostela, O Barbanza, Lugo, A Mariña, Cangas, Pontevedra, Vigo e Ourense.