Noticias do Concello da Coruña

Os premios “A Coruña Solidaria” dan a coñecer o labor da Cociña Económica a través da mirada de persoas con diversidade funcional

O concurso fotográfico, impulsado pola Sociedade Filatélica co respaldo da Fundación  Emalcsa, visibiliza o traballo artístico de persoas con discapacidade intelectual e síndrome de Asperxer

A concelleira de Benestar Social, Yoya Neira, agradeceu o labor das entidades que traballan a favor da inclusión social e que “regalan o seu tempo ao servizo dunha cidade cada día máis diversa”

A concelleira de Benestar Social, Igualdade e Participación, Yoya Neira, entregou esta tarde en María Pita os premios do concurso fotográfico “A Coruña Solidaria” impulsado pola Sociedade Filatélica, coa colaboración da Fundación Emalcsa, a través do seu programa de subvencións da Cultura Inclusiva, e da Cociña Económica.

O certame, que busca dar visibilidade ao traballo de persoas con diversidade funcional da Asociación a prol das persoas con discapacidade intelectual de Galicia (ASPRONAGA) e a Asociación Galega de Familias de Persoas Afectadas pola síndrome de Asperxer (ASPERGA), tiña como tema dar a coñecer o labor que a Cociña Económica realiza desde a súa fundación en 1886.

A concelleira agradeceu á Sociedade Filatélica e á Fundación Emalcsa a súa implicación no campo da inclusión cultural e felicitou aos premiados, “os verdadeiros protagonistas que nos ensinades cada día que non existen as barreiras, que non existe a exclusión”. Destacou tamén o inmenso labor de Aspronaga e Asperga e das familias “que traballades cada día para a eliminación de barreiras e conseguir unha cidade máis inclusiva”. 

Os premiados nesta terceira edición foron Vicente Fernández, Daniel Aguilera e José Martínez, mentras que Violeta González recibiu un áccesit pola a súa imaxe. A Sociedade Filatética fará unha tirada especial de selos e tarxetas con todas as fotografías gañadoras.

Ademais, as imaxes seleccionadas formarán parte da exposición filatélica conmemorativa do “330º aniversario da creación da liña marítimo-postal Falmouth-

Coruña”, que se celebrará o próximo mes de novembro na sala de exposicións da Casa da Cultura Salvador de Madariaga.

O acto contou coa presenza de Manuel Aguilar, director xerente da Fundación Emalcsa; José Luis Rey, presidente Sociedade Filatélica da Coruña; Rita González

Fernández, presidenta de Asperga; Nicanor Álvarez, presidente de Aspronaga e Jacinto Luís Torres, presidente da Cociña Económica.

Rey destaca a importancia de xornadas como eWoman 2019 para conseguir a igualdade de xénero

A alcaldesa e as concelleiras de Turismo e Benestar Social, Diana Cabanas e Yoya Neira, acudiron a unha nova edición que premiou a

traxectoria de Carmen Álvarez, de Carmelamola; da catedrática Minia Manteiga; de Rosa María Mirás, da firma Portomuíños; e da adestradora do RC Deportivo Genuine, Lucía Otero 

A alcaldesa Inés Rey e as concelleiras de Turismo e Benestar Social, Diana Cabanas e Yoya Neira, asistiron esta mañá á xornada eWoman 2019, organizada por La Opinión e Prensa Ibérica, como recoñecemento a mulleres emprendedoras do país, e na que se outorgou o premio Negocio Online á rapaza Carmen Álvarez Rodríguez, pola súa firma de complementos Carmelamola. A rexedora foi a encargada de entregarlle o galardón nunha edición na que se distinguiu a traxectoria profesional by Caixabank da docente e investigadora Minia Manteiga, primeira catedrática de Astrofísica de Galicia, e da fundadora da empresa Portomuíños, Rosa María Mirás, pioneira en comercializar algas para o consumo en Galicia. Finalmente, o premio ao Mérito Deportivo by La Liga foi para Lucía Otero, adestradora do RC Deportivo Genuine. 

Rey destacou a importancia da iniciativa porque “se precisan moitos eventos deste tipo para que a sociedade camiñe e avance en términos de igualdade de cara a compensar ese desaxuste social e facernos ver que pese ás condicións hostís, si se pode”. Neste aspecto, recordou que ela como primeira alcaldesa democrática garda xa anécdotas no referente a entrevistas nas que lle preguntan pola seu aspecto físico e pola conciliación familiar, e ás que sempre contesta con que as responderá cando llas formulen aos homes tamén. 

 

A rexedora valorou da xornada o paso por ela de persoas que dan exemplo ao destacaren en sectores nos que apenas hai presenza feminina como Laura Alegre, responsable do hotel Meliá María Pita onde tivo lugar a cita, ou Marta Albela, directora de banca retail de CaixaBank en Galicia. 

En eWoman, unha produtora como Emma Lustres contou emocionada toda esa carreira de fondo para converter a firma no que hoxe é e un brazalete chamado Miriam Ríos falou do que está a vivir capitaneando ao Real Clube Deportivo de mulleres, nunha posta en escena na que a televisiva Patricia Pérez explicou a súa andaina como referente na naturopatía. 

O Concello vese na obriga de pechar o

Centro Abeiro ante a imposibilidade de cumprir coa lei

A decisión tómase despois de informar ás entidades da cidade que traballan neste ámbito e de establecer unha coordinación conxunta

Benestar Social potenciará o servizo de rúa e o dispositivo de frío

  

O Goberno local vese na obriga de pechar o Centro Abeiro, un espazo municipal no que se desenvolvía o programa de baixa esixencia destinado á cidadanía en situación de rúa, en cumprimento da lei e por esixencias da Xunta de Galicia ao ditaminar que o centro non se adecuaba aos requisitos mínimos esixidos e, como consecuencia, interpoñendo unha sanción en outubro de 2017.

Á súa chegada ao Goberno, o Executivo local analizou co Servizo de Edificación as posibilidades de subsanar todos os requisitos específicos que o centro non cumpría e que eran esixidos pola normativa sectorial de aplicación. Tras esta análise, a única opción viable deixaría o espazo sen os metros mínimos necesarios que a Xunta esixe para este tipo de centros. Neste senso, e segundo o Goberno autonómico, o inmoble seguiría a ser non válido para exercer esta actividade. Polo tanto, co fin de cumprir a lei e de salvagardar a integridade física do cadro do persoal traballor e as persoas usuarias do albergue municipal, o Concello vese na obriga de pechar o Centro Abeiro.

Seguidamente, a Concellería de Benestar Social e Igualdade decidiu informar a todas as entidades da cidade que traballan neste ámbito para que foran coñecedoras da situación do Centro Abeiro e estableceu unha coordinación entre todas as partes involucradas. Desde o primeiro momento, as entidades comprometéronse a colaborar, cada unha dentro do seu ámbito, para subsanar as consecuencias de que o albergue municipal non se poida reabrir. Entre elas, destacar que ACCEM e Padre Rubinos manifestan a posibilidade de ampliar o número de prazas en ambos os centros.

Outra das medidas adoptadas desde a Concellería é a potenciación do servizo de rúa e o dispositivo de frío que o Concello presta a través dos seus convenios coa Cruz Vermella e ACCEM. 

O Concello dá os primeiros pasos para recuperar a Casa Cornide coa constitución do Consello da Memoria Democrática

A alcaldesa, Inés Rey, asegura que o Goberno local emprenderá accións legais unha vez que a asesoría xurídica lle dea luz verde

 A alcaldesa, Inés Rey, anunciou a intención do seu executivo de poñer en marcha o Consello de Memoria Democrática. Un primeiro paso, dixo, para a recuperación da Casa Cornide, na actualidade en mans da familia Franco. Esta actuación responde, explicou, ao firme compromiso do Goberno local coa recuperación da memoria histórica da cidade e á resolución adoptada no pleno do  pasado 16 de setembro cando todos os grupos políticos do Concello aprobaron emprender accións legais encamiñadas á recuperación da propiedade.

A alcaldesa explicou que o Consello de Memoria Democrática estará composto por membros da corporación, persoas expertas e representantes da Universidade, do Instituto José Cornide, do Ateneo Republicano e outras entidades que traballan no campo da memoria histórica. “A nosa intención é que unha das comisións especiais se centre na recuperación deste edificio”, dixo.

Confía en que “poidamos alcanzar un consenso que nos permita iniciar os trámites para que o edifico volva ás mans do Concello”. Para iso, indicou, solicitaranse informes técnicos que despois se derivarán á asesoría xurídica “para que estude si hai argumentos xurídicos que fundamenten a demanda e, non haxa ningunha dúbida de que o edificio ten que volver ser de titularidade pública”. 

De forma paralela, o Concello pretende declarar o edificio como Ben de Interese Cultural (BIC). Segundo a lei para que un inmoble sexa declarado como BIC é necesario que teña interese histórico, artístico, social ou científico. Por iso, pediráselle un informe a un dos maiores expertos da Universidade de Santiago neste tema para “contar co apoio da comunidade científica antes de lle solicitar a Patrimonio que declare a Casa Cornide como BIC”, sinalou a alcaldesa.

En canto á restauración da vidreira de María Pita, que inclúe a substitución da aguia preconstitucional, a rexedora explicou que debido á complexidade da obra tívose que redactar un novo contrato cun orzamento axustado, xa que é necesaria a supervisión dunha persoa experta encargada da dirección artística. Cando se desmontou a peza, lembrou a alcaldesa, os técnicos descubriron que moitas pezas estaba rotas e outras presentaban un estado de conservación deficitario.

Tamén confirmou que a Concellería de Cultura ten previsto crear unha comisión especial para proseguir coa supresión do rueiro das rúas con nomes franquistas iniciada polo executivo de Marea en cumprimento da Lei de memoria histórica do 2007. Eliminaranse ademais todos aqueles símbolos da ditadura franquista que aínda permanecen na cidade.