A Xunta de Voceiros reuniuse para actualizar a situación do coronavirus na cidade

A Xunta de Voceiros reuniuse esta mañá para actualizar a situación e recoller as propostas das e dos representantes das distintas forzas políticas co fin de frear a curva do coronavirus na cidade

  

Mentres a policía sancionou a 63 persoas e detivo a 3 desde o inicio do estado de alarma.

A Coruña, 23 de marzo de 2020.- A alcaldesa, Inés Rey, o voceiro do Goberno local, José Manuel Lage, e o responsable de Seguridade Cidadá, Carlos García Touriñán, reuníronse esta mañá co resto das persoas representantes das forzas políticas do concello para as informar das últimas medidas tomadas e de como están resultando de cara a frear a curva de contaxio do coronavirus na cidade. Tal e como acordaron a semana pasada, a xunta, que se realizará dúas veces á semana, convocarase de novo este xoves co fin de pór ao día en todo momento as e os representantes dos distintos partidos.

No encontro, as/os voceiros achegaron as súas propostas e falaron de cuestións laborais e veciñais derivadas deste estado de alarma. Rey destacou a actitude participativa de todas e todos eles e comprometeuse a estudar as ideas que presentaron porque “isto é un traballo en común por lles dar unha mellor resposta ás necesidades das e dos coruñeses”. 

Desde o Goberno local, explicaron como está a situación na rúa e informaron das 63 sancións que lle impuxo a policía á veciñanza e das tres persoas que foron detidas desde o inicio do estado de alarma. Tamén repasaron os protocolos de prevención establecidos nos diferentes departamentos municipais, en intalacións como os mercados e áreas e servizos de Medio Ambiente… Ademais, afondaron sobre como distribúe a seguridade na Coruña tras a cesión da Deputación de parte do IES Calvo Sotelo para unha segunda base dos Bombeiros no centro. 

Na primeira xuntanza, recordaron tamén todo o referido ao ámbito social e ás axudas, como o talón comedor e os comedores sociais, o acordo coa Cociña Económica, a habilitación do albergue no Pavillón de Deportes de Riazor que funciona desde onte, a gratuidade do aparcadoiro Materno-Oncolóxico e a dispoñibilidade que teñen tanto o persoal traballador como as persoas usuarias do Abente y Lago para deixaren o coche nos terreos da Solana.

Tamén trataron temas como a limpeza e a instalación dos baños públicos ou as negociacións que desde o concello se están realizando para conseguir máis equipos de protección, aínda que, nese punto, lembraron que o Sergas será o primeiro en abastecerse, debido a que o persoal sanitario é o que máis se expón ao virus, e a desinfección e as medidas de seguridade nos hospitais son primordiais. 

Mercados incorpora máis persoal de conserxería nas prazas de abastos

A concellería reforza con seis profesionais o control nos mercados co fin de protexer ás/aos traballadores, praceiras/os e clientas/es 

 

A Coruña, 23 de marzo de 2020.- A Concellería de Mercados reforza o cadro de persoal de conserxería das prazas de abastos con seis profesionais máis que desde hoxe e polo tempo en que se prolongue o estado de alarma prestarán os seus servizos. Deste xeito, refórzase o control nos mercados co fin de protexer ao máximo ao persoal municipal, ás e aos praceiros e vendedoras/es, e á veciñanza e clientela destes lugares dedicados á compra-venda. 

Mercados tomou esta decisión para garantir os protocolos que estableceron desde Medio Ambiente e saúde laboral en que se recomenda un maior control dos accesos ás instalacións, a limitación do número de clientas e clientes e a distancia deseguridade entre as e os compradores.