Equipos Atención Social

Benestar Social resolve preto de

400 demandas de emerxencia social durante a primeira

quincena do estado de alarma

O servizo realizou 2.400 asistencias entre os cinco puntos operativos de San Diego, Labañou, Os Mallos, Monte Alto e Elviña

A concellería de Benestar Social, que dirixe Yoya Neira, prorroga até tres meses as axudas alimentarias e concede 174 máis derivadas a entidades sociais coas que ten convenios asinados

A Coruña, 6 de abril de 2020.- Os Equipos de Atención Social (EAS) da Concellería de Benestar Social continúan atendendo estes días a cidadanía de forma telefónica. O servizo resolveu, a través do 010, un total de 400 solicitudes de emerxencia social desde que se decretou o estado de alarma e realizou 2.400 atencións entre os puntos en que están operativos: San Diego, Labañou, Os Mallos, Monte Alto e Elviña. As máis de 400 demandas que recibiron foron por parte de novas persoas usuarias e tamén de habituais que empregaron esta canle para contactaren co persoal. Canto ás axudas de emerxencia, no proceso de tramitación contaron coas áreas de Intervención Municipal e Facenda, co fin de lles axilizar a xestión. 

Por outra banda, as e os coruñeses beneficiarios das axudas para alimentos por un prazo de dous meses, terán unha prórroga dun mes máis. Neste aspecto, a concellería contactou con VEGALSA para establecer un protocolo, de xeito que a veciñanza poida mercar a comida cos vales municipais para unha persoa non titular. 

Ademais, o concello concedeu 174 novas axudas económicas subvencionadas pola concellería e derivadas a entidades sociais coas que ten convenios asinados. 

O servizo de atención cidadá do

010 atendeu 22.515 chamadas desde a declaración do estado de alarma

O concello mellora o sistema de xestión dixital facilitándolle aos veciños o acceso a máis de 60 trámites a través da web municipal

O servizo de atención cidadá do 010 atendeu 22.515 chamadas de veciños desde a declaración do estado de alarma. O pasado mes de marzo o 010 atendeu en total 35.356 chamadas de veciños, o que supón un incremento de cerca de 4.100 con respecto ao mesmo período do ano anterior.  Só nos tres primeiros días de abril suman outras 3.565 chamadas atendidas, a unha media de máis de un milleiro por día.

Moitas das consultas realizadas polos cidadáns están directamente relacionadas coa situación creada pola pandemia do coronavirus. Entre os temas sobre os que os veciños solicitan información figuran os desprazamentos permitidos durante o confinamento, preguntas sobre recursos de emerxencia social, talón restaurante, solicitudes de menús para recoller vinculados ás becas comedor, consultas sobre os estabelecementos que poden ou non abrir, o novo calendario fiscal, o dispositivo de aloxamento de persoas sen fogar, doazón de mascarillas e material sanitario, horarios do transporte público, cancelación de espectáculos e funcionamento da zona ORA, ademáis de consultas sobre as medidas postas en marcha polo Goberno central para facilitar os pagos de alugueres e hipotecas. “A atención cidadá nestes días a través do 010 é vital para axudar á poboación a resolver dúbidas, informarse  dos servizos dispostos polo Concello e atender posibles incidencias ou situacións de vulnerabilidade”, indica o concelleiro de Economía, Facenda e Réxima Interior, José Manuel Lage Tuñas.

Para facer fronte a situación creada, a concellería movilizou a todos os traballadores do 010, que mesmo prestan servizo os domingos e festivos. De luns a venres o horario de atención vai das 08:00 horas ás 20:00 horas. Os sábados, domingos e festivos aténdese desde a declaración do estado de alarma de 09:00 a 20:00 horas. O teléfono tamén estará dispoñible durante os festivos da Semana Santa. O 010 atende  todas as chamadas que recibe, pero desde a concellería aconsellan aos cidadáns que precisen facer algunha consulta que accedan a ese servizo desde o 981 920 010 cando se comuniquen desde un teléfono móvil para evitar esperas. “O persoal de atención cidadá e do 010 están facendo un gran traballo, afrontando situación delicadas e de gran tensión”, di Lage Tuñas.

Ademais, o Concello está a informar sobre todas as actuacións municipais vinculadas ao Covid-19 desde a súa páxina web, onde ten habilitada un apartado específico para consultar todos os decretos, resolución e medidas tomadas desde a entrada en vigor do estado de alarma. Entre o 16 e o 31 de marzo a web municipal recibiu 211.131 visitas.

Por outra banda, a Concellería de Economía, Facenda e Réxime Interior realizou melloras nos sistemas de acceso á web municipal para facilitar os trámites aos cidadáns. Así, o Concello permite agora realizar máis de 60 trámites distintos con sistemas de identificación alternativos ao certificado dixital. Ao longo do mes de marzo cursáronse 1.544 solicitudes por vía telemática, fronte as 973 que se contabilizaron no mesmo mes do ano 2018. O goberno local busca deste xeito facilitarlle os trámites a todos os veciños nun momento especialmente complexo pola situación de confinamento. “Estamos a facer todo o posible para facilitarlle as cousas aos cidadáns nestes difíciles momentos”, indicou Lage Tuñas, quen destacou o traballo que está a facer a área de Informática do Concello con ese  obxectivo, coordinándose cos distintos servizos municipais para permitir o  teletraballo a centos de empregados e garantir así a continuidade da actividade pública. 

O Concello mantén a súa actividade fóra tamén dos servicios esenciais que presta de modo presencial. Así, máis de 450 traballadores municipais conéctanse a diario de xeito remoto á plataforma dixital do Concello da Coruña.