O Consorcio de Turismo lanza a campaña “Miña Coruña”

O Consorcio de Turismo lanza a campaña “Miña Coruña” para animar a cidadanía a superar unida os malos momentos

A iniciativa trata de alentar as e os veciños co vídeo “Somos un faro”, en que reforza a importancia de afrontarmos xuntos esta crise sanitaria, á vez que recorda que falta menos para desfrutar da cidade e dos seus recursos

A Coruña, 11 de abril de 2020.- O Consorcio de Turismo e Congresos da Coruña, no seu labor de promover a cidade como destino turístico, lanza unha nova campaña titulada 'Miña Coruña' para animar a cidadanía a unirse de cara a superar os momentos duros en que todas e todos nos atopamos.

A campaña amosa imaxes da Coruña cunha mensaxe esperanzadora para levar mellor este período de confinamento e nela o concello agradece o traballo e a solidariedade dos colectivos profesionais e da veciñanza en xeral pero, ao mesmo tempo, recorda que falta menos para desfrutarmos da nosa cidade e das súas riquezas.

O vídeo, que se pode en ver https://youtu.be/tErwAX5NZEQ, dura un minuto e 12 segundos e busca enxalzar os valores atlánticos da urbe, coa luz da Torre de Hércules como eixe central. "Coa luz da vosa solidariedade, a luz da vosa empatía, a luz da responsabilidade e da esperanza; unha luz que guiará a xeracións sinalando o futuro en futuras tormentas", di o texto da produción audiovisual.