Campos da Torre

Borrego asegura que os campos da Torre son accesibles a toda a cidadanía

O concelleiro de Deportes precisou que hai que cumprir coa normativa para o seu desfrute e que se está a buscar unha solución para que, cando as instalacións non alberguen competicións oficiais, poidan ser utilizadas por un público máis familiar

A Coruña, 22 de agosto de 2019.- O concelleiro de Deportes, Juan Ignacio Borrego, asegura que o uso das instalacións do campo da Torre é accesible a toda a cidadanía que o solicite e que, en ningún caso, cambiou a normativa existente ata o momento. Recorda o edil que a cidade deportiva como todos os equipamientos dependentes da concellería teñen un uso regulado, polo que hai que cumprir coa normativa que “é alugar a infraestrutura e calquera persoa pode facelo”. 

Borrego insiste en que a instalación está aberta para todo o público e que o seu uso non está restrinxido unicamente a clubs e federacións: “Calquera grupo que se achegue alí por una taxa de preto de oito euros ten unha hora de medio campo con vestiario e ducha, 16,74 euros ata 25 persoas poden desfrutar do campo enteiro, e por tres euros poden xogar ao pádel ata catro persoas, prezos moi asequibles para desfrutar da instalación”.

Neste aspecto, sinala que o Concello é responsable civil de todo o que ocorre dentro e fóra dos campos. No caso da Torre, explica que a instalación non está nunca parada polo acceso que dá ás instalacións de golf, ao contrario que pasa cos campos da Leyma ou o da Grela, que pechan cando non hai competición: “Estamos traballando para buscar unha solución precisamente na época na que está sen actividade oficial para facilitarlle o acceso ás familias con todos os riscos cubertos”.