A concelleira Silvia Cameán, presidenta da Comisión de Benestar, insta ao goberno municipal a abrir un novo prazo de subsanación de erros na convocatoria de bolsas comedor e revogar as denegacións. “É unha vía legal para evitar que centos de familias queden sen axudas á alimentación este curso por trabas burocráticas”, explicou Cameán.
“Tendo en conta 504 solicitudes foron rexeitadas por problemas coa documentación, unha cifra inxustificable, pedímoslle ao goberno que ofreza unha solución e desta vez acompañe ás familias para facilitar a solicitude das bolsas comedor, en lugar de limitarse a denegar. Falamos de persoas, non de cifras”, sinalou a concelleira.
Solucións, non leccións
Polo que respecta ás 141 denegacións por ter débedas coa administración —un 12% de todas as solicitudes presentadas—, o grupo municipal da Marea Atlántica esixe revisalas. Como explica Silvia Cameán, “hai casos nos que é posible solicitar un aprazamento da débeda, o que serve para acreditar o cumprimento de obrigas segundo a Lei de Subvencións”.
Este martes reunirase a Comisión de Benestar Social ás 12.00h en María Pita, e presidenta do órgano trasladaralle estas vías de solución ao goberno municipal, ademais da total vontade de colaboración da Marea Atlántica para facelas posibles. “Hai familias, e non poucas, que dependen das bolsas comedor para garantirlles unha correcta alimentación ás súas fillas e fillos. A obriga dun goberno é darlles solucións, non culpabilizalas”, engadiu Cameán.
No hay comentarios:
Publicar un comentario