Impulso a Cuarta Rolda

O Concello impulsa a construción da Cuarta Rolda, clave para o desenvolvemento económico da cidade e da área metropolitana

O Goberno municipal confía en contar co apoio de todas as forzas políticas nun “proxecto de cidade”

A alcaldesa e os concelleiros de Urbanismo e Innovación reuníronse esta mañá con asociacións de veciños e empresarios dos polígonos da Grela, Pocomaco e Vío para falar sobre o estado do proxecto

O Concello da Coruña impulsará, xunto co Ministerio de Fomento, a construción da Cuarta Rolda, unha infraestrutura clave para o desenvolvemento económico da cidade e da área metropolitana que dispón xa dun estudo informativo e dun informe de declaración ambiental.

“Farémolo da man das persoas representantes dos polígonos, do tecido empresarial e da veciñanza”, explicou Inés Rey. Trátase dun proxecto de cidade no que o Goberno local busca implicar a todos os partidos políticos e no que “non caben partidismos nin ideoloxías”. Para iso, o grupo municipal socialista presentará no próximo pleno ordinario para a súa aprobación unha Declaración Institucional co fin de sumar o apoio do resto de forzas. ”Non renunciaremos a esta infraestrutura”, apuntou a rexedora durante a reunión que mantivo cun pool de asociacións de veciños e empresarios da cidade, integrado pola Federación de Asociacións Veciñais da Coruña e da Área Metropolitana e os polígonos de Pocomaco, A Grela, e Vío, para falar da importancia do vial.

O encontro, no que tamén estiveron presentes o edil de Urbanismo, Juan Díaz Villoslada, e a concelleira de Innovación e Industria, Eva Martínez Acón, serviu para

“xuntar esforzos“ e que as entidades presentasen un informe que lle pon cifras aos  efectos da execución deste vial atendendo ao crecemento do emprego, o investimento privado e a recadación das distintas administracións “en definitiva ao desenvolvemento da Coruña e da súa comarca”.

A rexedora sinalou que o Goberno local está en contacto permanente co Ministerio de Fomento sobre este vial, que terá unha lonxitude de 2,9 quilómetros e que conta cun orzamento aproximado de 27 millóns de euros. A Cuarta Rolda supón a prolongación da AC-15, o novo acceso ao Porto Exterior, ata conectar coa AC-14 a Terceira Rolda. Trátase, explicou a rexedora, dun vial que non só é fundamental para a conexión co Porto Exterior, senón que del depende o futuro desenvolvemento de toda a cidade e da área. “Desconxestionará zonas de tráfico que nestes momentos xa están saturadas como os polígonos da Grela e Pocomaco, facilitará a comunicación con Vío e converterase no motor da atracción de empresas que necesitamos”, dixo.

Para o Concello, a construción desta infraestrutura planeada por Fomento evitaría o futuro colapso do tráfico nesas zonas, unha vez que o Porto Exterior e os polígonos de Vío e Morás alcancen a ocupación prevista. A estrada terá a súa orixe no enlace do acceso ao Porto exterior, entre a AC-15 e a AG-55, finalizará enlazando coa Terceira Rolda en Pocomaco e dispoñeranse os ramais necesarios que permitirán conectar o Porto Exterior.

Esta infraestrutura, explicou, permitirá canalizar os tráficos de vehículos pesados desde o Porto Exterior da Coruña cara á A-6 a través da Terceira Rolda, nunha zona onde se sitúan os principais accesos aos polígonos da Coruña e conseguirase desta maneira mellorar a mobilidade, seguridade e tempos de percorrido para os tráficos xerados polo Porto Exterior e aumentarase así a súa competitividade. Da mesma maneira, conseguirase con esta actuación conectar o Porto Exterior e o porto interior da cidade a través da AC-15, Terceira Rolda e AC-10.

A alcaldesa cualificou de “incontestables” as cifras recollidas no informe presentado polo persoal representante dos polígonos. A construción do vial supoñería, explicou, maior captación de empresas, incremento do investimento, un PIB máis equilibrado, maior peso da industria, menor dependencia dos servizos e máis emprego. O estudo revela que nos próximos dez anos a cidade podería contar con 796 empresas novas, 372 para Vío e 425 para As Rañas. 

En canto á xeración de emprego, estímase en 11.075 os novos empregos nos próximos dez anos; 5.298 en Vío e 5.867 nas Rañas. As persoas residentes na cidade aumentarían en 7.693 persoas e na área metropolitana situaríanse ao redor de 3.382. Os efectos deixaríanse notar na recadación municipal por licenzas de obras e actividades arredor da cifra de 93 millóns de euros.