O Goberno local reúnese coa veciñanza dos Rosales

O Goberno local reúnese coa veciñanza dos

Rosales e comprométese a atender  as súas demandas 

A alcaldesa, e os concelleiros de Urbanismo e Medio Ambiente, Juan Díaz  Villoslada e Esther  Fontán, mantiveron un encontro esta tarde no centro cívico cos representantes veciñais e a asociación de empresarios  

A Coruña, 18 de novembro de 2019.- A alcaldesa, Inés Rey, e os concelleiros de Urbanismo e Medio Ambiente, Juan Díaz  Villoslada e Esther  Fontán, reuníronse esta tarde cos representantes das asociacións de veciños e empresarios do barrio dos Rosales, para abordar as principais demandas da zona. O encontro incluíu unha visita ás instalacións do centro cívico, onde as veciñas e os veciños lle mostraron á rexedora as humidades que presenta o local. Rey comprometeuse a poñer en marcha os traballos para arranxar os danos.

O Goberno local tamén estudará a posibilidade de crear un rexistro único para axilizar os trámites que teñen que realizar os colectivos de cara a organizar as festas do barrio, tal e como lle demandaron as e os residentes.

Inés Rey tamén se comprometeu a levar a cabo melloras na mobilidade do barrio coa instalación de máis luminaria nos pasos de peóns e a contemplar a posibilidade de incrementar as liñas de autobuses e frecuencias para conectar Os Rosales con outros barrios da cidade.

Pola súa banda, a veciñanza mostrou o seu desacordo con algunha das actuacións previstas no proxecto de ampliación do parque infantil da praza Elíptica e solicitaron á rexedora que se recoloque a zona biosaudable e eliminen o areal do parque infantil. En canto ás instalacións deportivas, demandan melloras no sistema de ventilación e da rede de saneamento no pavillón polideportivo.

 

En canto ás obras de mellora do Camiño do Cura, o responsable de Ubanismo confirmou que o Goberno local executará a súa urbanización, para a que terán que realizar previamente unha modificación parcial no Plan Xeral de Ordenación Municipal (PXOM) que xa se está tramitando.