XX Premio Emprende e Reunión Concello Alcalde de Oleiros

Rey destaca os vinte anos dos galardóns cos que AJE distingue as mellores persoas emprendedoras da provincia

A alcaldesa e a concelleira de Innovación, Eva Martínez Acón, presentaron a vixésima edición dos Premios Emprende, organizados polo colectivo, e que se outorgarán o 21 de novembro nunha gala en Finca Montesqueiro

A Coruña, 6 de novembro de 2019.- A alcaldesa Inés Rey e a concelleira de Innovación, Eva Martínez Acón, participaron esta mañá na presentación do XX

Premio Emprende, organizado pola Asociación de Jóvenes Empresarios-AJE Coruña, e que repartirá 27.000 euros en galardóns o vindeiro 21 de novembro nunha gala en Finca Montesqueiro. 

A rexedora destacou que a iniciativa do colectivo de distinguir as mellores ideas emprendedoras que afloran na provincia é clave para darlles aos mozos e ás mozas as pílulas necesarias para que non tiren a toalla e valorou a traxectoria de vinte anos de AJE poñéndolles medallas a quen hoxe “son un nome, un referente dentro dun campo en concreto. Quen subirá á palestra o 21 tamén o será nun futuro. Supoñen riqueza e emprego, crecemento económico nunha Coruña que necesita un impulso”. 

A rexedora recordou que o tecido empresarial verase beneficiado por un proxecto como a Cidade das TICS, da que poderán transvasar tecnoloxía e darlles forma a novidades que melloren os seus produtos, avalados por profesionais expertos”. Rey falou da importancia de ter a actitude axeitada para que o emprendemento dea resultados, “esa actitude é a que temos que distinguir” e insistiu en que esas “lampadiñas” que no seu día se acenderon, hoxe son xa realidades que desde AJE queren aplaudir para que se expandan e que a cidadanía as coñeza e transcendan máis alá de Galicia e o Estado co fin de que se convertan en referentes, igual que o son outras marcas coruñesas que hoxe “nos colocan como principais produtores en sectores como a moda ou a alimentación”. 

 Pola súa parte, o presidente da Asociación de Jóvenes Empresarios-AJE Coruña, Miguel Miragaya, explicou que os premios abranguen dúas categorías e tres accésit cos que recoñecerán o labor daquelas persoas “que deixaron a un lado temores e dificultades para crearen unha empresa que xera riqueza”. 

O único requisito que deben cumprir é que o capital social  das  empresas  candidatas deberá estar participado nun 25% como mínimo por persoas físicas menores de 41 anos. Poderán presentarse propostas ata o 15 de novembro na asociación, onde se pode solicitar máis información. Ademais, os requisitos están colgados en www.emprendecoruna.com e tamén se poden consultar a través do teléfono 981 915 635 e no correo electrónico info@ajecoruna.com. 

Inés Rey reúnese co alcalde de Oleiros para abordar a continuidade da liña 1A

A alcaldesa comprométese a estudar a petición de Ángel García Seoane antes de que remate o ano  

A Coruña, 6 de novembro de 2019- A alcaldesa da Coruña, Inés Rey, reuniuse hoxe co alcalde de Oleiros, Ángel García Seoane, co fin de abordar as melloras de mobilidade na área metropolitana e máis concretamente no concello limítrofe oleirense. Á xuntanxa tamén acudiu o concelleiro de Mobilidade, Juan Díaz Villoslada. Rey escoitou a demanda do seu homólogo de Oleiros de manter durante todo o ano o percorrido da liña de autobús 1A ata Santa Cristina. A rexedora anunciou que estudará co persoal técnico e xurídico do Concello a posibilidade de manter durante todo o ano esta liña aínda que a priori non ve ningún problema para concretar esta proposta do Concello de Oleiros.

O Goberno local aposta pola mellora das conexións do transporte público entre a cidade e súa área metropolitana. “Temos que mellorar e ampliar os servizos coa área metropolitana posto que A Coruña non pode estar illada dos concellos que a rodean”. As cifras do servizo do pasado verán foron boas, segundo o estudo da Compañía de Tranvías, polo que, apunta Rey, “trátase dun servizo público que pode axudar a liberar a masiva entrada de vehículos privados na cidade”.

Rey tratará con Mobilidade esta reivindicación e espera ter unha resposta antes de que remate o exercicio.