O IES Calvo Sotelo para persoal sanitario

A Deputación, a Universidade e o

Concello da Coruña acordan acondicionar parte do IES Calvo Sotelo para persoal sanitario

Unha trintena de profesionais da área coruñesa que loitan contra o Covid-19 aloxaranse na residencia universitaria Elvira Bao, que alberga este edificio

A alcaldesa, Inés Rey, destaca o consenso acadado polas institucións de cara a axudar as persoas que traballan en primeira liña

A Coruña, 1 de abril de 2020.- A Deputación, a Universidade e o Concello da Coruña acordan acondicionar as instalacións da residencia universitaria Elvira Bao, no IES Calvo Sotelo, para o cadro de persoal da Área Sanitaria da Coruña, logo de que a alcaldesa Inés

Rey visitase, xunto co presidente da Deputación, Valentín González Formoso; o reitor da UDC, Julio Abalde; e o xerente do complexo hospitalario coruñés, Luís Verde, a dita infraestrutura este pasado luns. 

A rexedora destacou o consenso que se logrou entre as tres institucións co fin de combateren a pandemia dándolle un uso ao edificio de residencia temporal para as e os profesionais do CHUAC que, polas súa situación familiar ou persoal, precisen dun aloxamento alternativo mentres dure a crise sanitaria. Deste xeito, estarán máis tranquilas/os e poderán diminuír a súa carga emocional derivada do que están a vivir, sobre todo, aquelas/es que traballan en primeira liña.

A Comisión de Docencia da Área Sanitaria da Coruña-Cee xestionou a unidade e contactou coas persoas que precisan apoio para coñecer as súas necesidades e coordinar esta acción dun xeito óptimo. 

Unha parte do inmoble está sendo usada xa como base satélite para os Bombeiros despois de que a Deputación lla cedese ao concello, polo que as autoridades decidiron que, co obxecto de minimizar os riscos, o persoal sanitario se localizará preferentemente na Residencia Elvira Bao, que conta con accesos de entrada e saída propios.

As persoas aloxadas terán ao seu dispor un total de 60 habitacións (58 dobres e dúas adaptadas para persoas con mobilidade reducida), que serán ocupadas de xeito individual. As primeiras persoas usuarias da residencia incorporaranse mañá xoves, 2 de abril. A Deputación da Coruña contratará ademais un servizo limpeza e outro de cátering, que se encargará de lle subministrar cada día o almorzo e a cea ao persoal médico e de enfermaría que pase alí estas semanas. A UDC ofrecerá un servizo de lavandería e Inditex achegará a roupa de cama das habitacións. 

Un total de 66 persoas da área sanitaria informáronse sobre esta iniciativa, á que se acollerán 30 profesionais nos vindeiros días. 

A Coruña súmase á iniciativa de

PHotoESPAÑA de fotografar a cidade desde as fiestras

A veciñanza poderá subir as instantáneas a través do Instagram do festival e as mellores formarán parte dunha mostra colectiva en xuño, situada nun lugar emblemático

A Coruña, 1 de abril de 2020.- O Concello da Coruña súmase á convocatoria do Festival Internacional de Fotografía e Artes Visuais PhotoESPAÑA, a través da cal a veciñanza poderá explorar a súa creatividade e plasmala en instantáneas sacadas desde as fiestras. O resultado de #PHEdesdemibalcón exporase no mes de xuño nunha mostra que se situará nunha praza ou nun lugar emblemático da cidade e tamén nas súas balconadas. Deste xeito, o festival quere homenaxear as persoas que tan grande esforzo están realizando estes días por quedaren na casa. Estes elementos mediante os que as e os coruñeses se asoman ao exterior para aplaudiren e conectárense co de fóra servirán, unha vez que pase o confinamento, de soporte para albergar a selección de imaxes sacadas desde o interior. 

A exposición poderase desfrutar durante o verán e desde a rúa. Para participar, unicamente haberá que subir as fotografías a través de Instagram cos hashtags #PHEdesdemibalcón e #PHE20. A páxina web do evento acollerá unha galería virtual coas mellores pezas gráficas presentadas. 

Ademais da Coruña, xa están tamén inscritos os concellos de Madrid, Alcalá de Henares, Alcobendas, Segovia, Salamanca, Valladolid, Santander, Badaxoz e Sevilla, aos que se irán sumando máis de cara a facer máis levadía esta corentena. Nestes momentos en que o compromiso individual é decisivo, PHotoESPAÑA lanza  un dobre chamamento. Por un lado, a todas/os aqueles que desde as súas fiestras e balconadas observan o seu día a día, para animalos a construíren un relato fotográfico co que expresaren a súa creatividade e atoparen nel novas formas de comunicarse. E, por outro, queren convidar a que os consistorios do Estado convertan os espazos emblemáticos das súas urbes nun gran lenzo en que amosaren as imaxes das persoas que viven neles.

Trátase de lle dar unha oportunidade á veciñanza para que comparta colectivamente e a pé de rúa todas as miradas individuais. 

Estas exposicións marcarán o inicio da vixésimo terceira edición de PHotoESPAÑA 2020, que se desenvolverá na tempada estival até finais de setembro. A convocatoria estará aberta até o 17 de maio e cada día, a organización subirá novas composicións á súa web.