Reunión entre o Concello e a produtora coruñesa Gato Salvaje

O Concello valora positivamente a aceleradora de videoxogos que

creará a produtora Gato Salvaje

Os responsables da empresa calculan que poderán dar traballo a preto de 200 profesionais en tres anos. Tamén se ofreceron a colaborar e formar parte do proxecto Cidade das TIC e compartir nel a súa experiencia

A Coruña, 2 de agosto de 2019.- A alcaldesa Inés Rey e a concelleira de Innovación, Eva Martínez, e os responsables da produtora coruñesa Gato Salvaje, Fernando Prieto e Sergio Prieto, mantiveron un encontro para coñecer en detalle o proceso de creación do videoxogo “The waylanders”, que na actualidade se atopa en fase de produción, pero que estará dispoñible no mercado en 2.020. 

A alcaldesa amosou a súa dispoñibilidade a colaborar no seguinte reto, que pasará por crear unha aceleradora de videoxogos, que sirva de fonte de emprego para a cidade. Desde Gato Salvaje, calculan que a través dela poderán dar traballo nun período de tres anos a preto de 200 profesionais e que a súa empresa verá duplicado o seu cadro de persoal a finais do ano que vén. 

Neste aspecto, Gato Salvaje ve na Cidade das TIC unha oportunidade, por iso que os seus responsables se ofreceron a colaborar e formar parte dela para converter o proxecto industrial e tecnolóxico nunha especie de “Silicon Valley” coruñés. Por outra parte, a alcaldesa e a concelleira valoraron positivamente a presenza da Coruña en “The waylanders” xa que este tipo de produtos son imán para os turistas que logo de ver as paisaxes recreadas da cidade se animarán a coñecelas de primeira man.

A CORUÑA, PROTAGONISTA

Será o primeiro videoxogo que terá Galicia e A Coruña como escenarios dunha historia ideada con saltos temporais, de forma que o xogador pasará da Brigantia celta á cidade no medievo. Os responsables da criatura explicaron que a Torre de Hércules será guía e estará presente en todos os momentos da partida, xa sexa na súa primeira versión como na medieval, deseñadas ambas libremente. 

Arredor dela, xirarán as distintas lendas e mitoloxías coruñesas con personaxes que non serán planos. Transmitirán emocións e contarán cun vocabulario de 250.000 palabras. 

Os autores sinalaron que a peza foi posible, en parte, polos talentos que saíron dos cursos formativos que deron desde a produtora e que financiou o Concello. Dos 73 que recibiron clases, 27 quedáronse a traballar na súa sede do centro de empresas Accede Papagaio. 

O videoxogo presentouse na pasada Gamescom de Colonia, a maior feira do mundo en asistencia de público, con máis de 380.000 visitantes. Durante o evento, apareceu en portada na segunda revista mundial do sector, “PCGamer”, con máis de 50 millóns de lectores mensuais, e en 200 artigos de 30 países.